Genesis 22
Dirava ese Aberahamo dekenai ia oda, Isako do ia henia
1Inai murinai, Dirava ese ia ura Aberahamo do ia tohoa, vadaeni ia dekenai ia gwau, “Aberahamo e!” Aberahamo ia gwau, “Lau inai.”2Dirava ia gwau, “Oiemu natuna oi abia, oi sibona oiemu natuna korikori, Isako, oi lalokau henia merona. Moraia tano dekenai do umui lao. Unuseni oi do lau hamaoroa, ororo ta ena ataiai, mero be lahi boubou gauna do oi halaoa.”
3Kerukeru daba maragina dekenai, Aberahamo ese iena doniki ia abia hegaegae, iena natuna Isako bona iena hesiai taudia rua ia danu ia abia. Lahi boubou ena au ia siria, bona ia toreisi, Dirava ia hamaoroa gabuna dekenai ia raka hamatamaia. 4Dina namba 3 dekenai Aberahamo ese gabuna ia itaia, daudau dekenai. 5Vadaeni, iena hesiai taudia dekenai ia gwau, “Umui ruaosi doniki danu iniseni umui noho. Lau be inai mero danu do ai lao unuseni, tomadiho totona, gabeai do ai giroa mai umui dekenai.”
6Aberahamo ese lahi boubou ena au ia henia iena natuna Isako dekenai, do ia huaia lao totona. To Aberahamo sibona ese lahi bona kaia iena imana dekenai ia abia lao. Idia ruaosi idia raka hamatamaia hebou. 7Nega sisina Isako ese iena tamana Aberahamo dekenai ia hereva, ia gwau, “Tamagu e.”
Ia haere, ia gwau, “Natugu e, lau inai.” Isako ia gwau, “Lau itaia, oi dekenai lahi bona au idia noho, to lahi boubou gauna ena mamoe be edeseni?”
8Aberahamo ia haere, ia gwau, “Natugu e, Dirava sibona ese mamoe do ia henia, lahi boubou gauna totona.” Vadaeni, ruaosi ma idia raka lao.
9Ia dekenai Dirava ese ia hamaoroa gabuna dekenai idia ginidae neganai, Aberahamo ese boubou patana ia haginia, bona patana ena latanai au ia atoa hegaegae. Vadaeni iena natuna be varo dekenai ia kwatua, bona boubou patana dekenai ia atoa, au latanai. 10Vadaeni Aberahamo ese iena imana dekenai kaia ia abia, iena natuna alaia mase totona. 11To Lohiabada ena aneru ese guba dekena amo ia dekenai ia boiboi, ia gwau, “Aberahamo e, Aberahamo e!” Ia haere, ia gwau, “Lau inai.”
12Ia gwau, “Oiemu imana mero dekenai oi atoa lasi, kara ta danu oi karaia lasi ia dekenai. Harihari lau diba vadaeni, oi be Dirava oi gari henia momokani, badina be oiemu natuna korikori lau ura abia neganai, oi dogoatao lasi.”
13Aberahamo ese iena matana ia negea, bona ia murinai mamoe tau ta ia itaia, au ta ese ia dogoatao noho, iena doana dekenai. Ia lao, mamoe ia abia, bona ia henia, lahi boubou gauna totona, vadaeni unai mamoe ese iena natuna ena gabuna ia abia. 14Aberahamo ese unai gabu ena ladana ia atoa, “Lohiabada ia Henia”. Inai bamona idia gwauraia, ia mai bona hari, idia gwau, “Lohiabada ese ia henia, iena ororo dekenai.”
15Lohiabada ena aneru ese Aberahamo dekenai ma ia boiboi lou nega iharuana, guba dekena amo. 16Ia gwau, “Lohiabada ese inai bamona ia hereva: Lau sibona egu ladana dekenai gwauhamata metauna lau gwauraia inai: Oiemu natuna mero tamona sibona, lau abia gwauraia neganai oi dogoatao lasi. Inai kara oi karaia dainai, lau ese oi do lau hanamoa bada herea. 17Lau gwauhamata inai, tubudia momo oi dekenai do lau henia, edia momo be guba dekenai noho hisiu, bona kone dekenai noho miri bamona. Oiemu tubuna taudia ese idia dekenai idia tuari taudia edia hanua ibounai do idia abia. 18Tanobada besedia ibounai ese lau dekenai do idia noinoi, idia do lau hanamoa, oiemu tubuna lau hanamodia vadaeni hegeregerena. Inai bamona do idia noinoi, badina be oi ese lauegu oda oi kamonai henia dainai.”
19Aberahamo ese iena hesiai taudia ruaosi dekenai ia giroa lou, vadaeni ibounai idia giroa lou Bere Sieba dekenai, Aberahamo ena noho gabuna.
Nahoro ena tubuna
20Gabeai Aberahamo ese hereva ta ia kamonai, iena tadina Nahoro ena adavana Milika ese natudia ia havaraia. 21Tau guna ena ladana be Usu, iena tadina be Busu bona Kemuela, Arama ena tamana, 22Keseda bona Haso bona Pilidasa bona Idilapa bona Betuela. 23Inai Betuela be Rebeka ena tamana. Inai natuna memero 8 be Milika ese ia havaraia Aberahamo ena tadina Nahoro dekenai. 24Nahoro ena adavana iharuana Reuma ese danu natudia ia havaraia, edia ladana be Teba, bona Gahama bona Tahasa, bona Maka.
Copyright information for
HMO